haucer's etraction

Heere Taketh the Makere of this Book his Leve

ow preye I to hem alle that herkne this litel tretys or rede, that if ther be any thyng in it that liketh hem that therof they thanken oure Lord Jhesu Crist, of whom procedeth al wit and al goodnesse. And if ther be any thyng that displese hem, I preye hem also that they arrette it to the defaute of myn unkonnynge, and nat to my wyl, that wolde ful fayn have seyd bettre if I hadde had konnynge. For oure book seith, "Al that is writen is writen four oure doctrine," and that is myn entente. Wherfore I biseke yow mekely, for the mercy of God, that ye preye for me that Crist have mercy on me and foryeve me my giltes; and namely of my translacions and enditynges of worldly vanitees, the whiche I revoke in my retracciouns: as is the book of Troilus; the book also of Fame; the book of the .xxv. Ladies; the book of the Duchesse; the book of Seint Valentynes day of the Parlement of Briddes; the tales of Caunterbury, thilke that sownen into synne; the book of Leoun; and many another book, if they were in my remembrance, and many a song and many a leccherous lay; that Crist for his grete mercy foryeve me the synne. But of the translacion of Boece de Consolacione, and othere bookes of legendes of seintes, and omelies, and moralitee, and devocioun, that thanke I oure Lord Jhesu Crist and his blisful Mooder, and alle the seintes of hevene, bisekynge hem that they from hennes forth unto my lyves ende sende me grace to biwayle my giltes, and to studie to the salvacioun of my soule, and graunte me the grace of verray penitence, confessioun and satisfaccioun to doon in this present lyf, thurgh the benigne grace of hym that is kyng of lynges and preest over alle preestes, that boghte us with the precious blood of his herte; so that I may been oon of hem at the day of doom that shulle be saved. Qui com patre et Spiritu Sancto vivit et regnat Deus per omnia secula. Amen.

Heere is Ended the Book of the Tales of Caunterbury, compiled by Geffrey Chaucer, of whos soule Jhesu Crist have Mercy.   Amen